ខេត្តព្រះសីហនុ៖ អភិបាលខេត្តព្រះសីហនុ ស្នើសុំឱ្យពលករវៀតណាមមកធ្វើការស្របច្បាប់ ដើម្បីកុំឱ្យមានជនខិលខូចឆ្លៀតឱកាសក្នុងការកេងប្រវញ្ញទៅលើកម្លាំងពលកម្ម។

លោក គួច ចំរើន អភិបាលខេត្តព្រះសីហនុ លើកឡើងបែបនេះក្នុងជំនួបជាមួយអគ្គកុងស៊ុលថ្មី នៃស្ថានអគ្គកុងស៊ុលសាធារណរដ្ឋសង្គមនិយមវៀតណាម ប្រចាំខេត្តព្រះសីហនុ លោក ឡៃ សួនឈាន (LAI XUAN CHIEN) នៅថ្ងៃទី៩ ខែកុម្ភៈ ឆ្នាំ២០២៣។

លោកបានឱ្យដឹងថា ដើម្បីកុំឱ្យមានជនខិលខូចឆ្លៀតឱកាសក្នុងការកេងប្រវញ្ញទៅលើកម្លាំងពលកម្ម ដូច្នេះទាមទារឱ្យមានការចូលរួមទាំងអស់គ្នា ដើម្បីងាយស្រួលក្នុងការយើងគ្រប់គ្រង និង ត្រូវបង្កើតកិច្ចសហប្រតិបត្តិការ និងជួយបញ្ចៀបការយល់ដឹងស្តីអំពីច្បាប់កម្ពុជា នៅពេលមកធ្វើការនៅខេត្តព្រះសីហនុ ត្រូវគោរពតាមច្បាប់របស់កម្ពុជា ដើម្បីសុខដុមនីយកម្មទាំងអស់គ្នា។

អភិបាលខេត្តរូបនេះ ក៏បានស្នើសុំជួយសម្របសម្រួលដើម្បីទៅធ្វើទស្សកិច្ចនៅនៅខេត្តបាក់លីវ ប្រទេសវៀតណាមដែលជាខេត្តសម្ព័ន្ធមេត្រីភាពជាមួយនឹងខេត្តព្រះសីហនុ ព្រមទាំងបានស្នើសុំឱ្យអគ្គកុងស៊ុលជួយជំរុញជើងហោះហើរត្រង់ពីហាណូយមកខេត្តព្រះសីហនុ ព្រោះខេត្តព្រះសីហនុ ក៏មានទំនាក់ទំនងទេសចរតាមផ្លូវទឹករួមមកហើយ។

ជាមួយគ្នានេះដែរ អគ្គកុងស៊ុលវៀតណាម ប្រចាំខេត្តព្រះសីហនុ បានឯកភាពចំពោះការលើកឡើងរបស់ឯកឧត្តមអភិបាលខេត្ត ឱ្យពលករបរទេសទាំងអស់ត្រូវអនុវត្តច្បាប់របស់ប្រទេសនីមួយៗដែលជាការងាយស្រួលក្នុងការគ្រប់គ្រង។

ទន្ទឹមនោះ លោក ឡៃ សួនឈាន ក៏ចង់ឈ្វេងយល់ពីវិស័យទេសចរណ៍របស់កម្ពុជា ដើម្បីងាយស្រួលក្នុងការផ្សព្វផ្សាយទៅដល់ប្រជាពលរដ្ឋវៀតណាម និងអ្នកវិនិយោគយើងបន្តកិច្ចសហប្រតិបត្តិការគ្នា ដើម្បីកំណើនសេដ្ឋកិច្ច ពាណិជ្ជកម្ម និងទេសចរណ៍ សង្ឃឹមថាប្រទេសទាំងពីរនឹងរួមគ្នាជួយគាំទ្រគ្នាទៅវិញទៅមកក្នុងនាមជាប្រទេសជិតខាងល្អបន្ថែមទៀត៕